unya nobubi wabuguqula uSmakade, waveza ubuhle nenhlanhla
uGenesisi 50
Uthé engafa uyise, baqala-ke manje abanewabo bakaJosefa ukuba mehlawana, benqena ukuthi uJosefa usezokhipha isibhongo, aziphindisele kulobu bubi ababemenzé bona. “Mhlawumbe usasibambele igqubu nanamuhla lokhu!”, besho befunisela.
Sebesondela kuye-ke bemncenga, bethi: “Ubaba wasiyala ngaphambi kokuba asishiye, wathi: `Zishwelezeleni kuJosefa, nimncenge, anganijezisi kulokhu enamenza kohna!´Silapha-nje manje; siyakucela: Xola, Mfowethu! Siyashweleza, siyazincengela egameni likaSmakade uNkulunkulu kayihlo nathi esimkhonzayo!” Zehla izinyembezi nakuJosefa!
Bamkhothamela baze bazibhuqabhuqa othulini, bethi: “Siyazinikela: Sesiyizigqili zakho!”
UJosefa waphendula wathi: “Ningesabi, Bafowethu! Ngeke ngisiguqule isinqumo sikaNkulunkulu. Kuyiqiniso ukuthi nangenzela unya nobubi obuphindiwe, nisophé ungenza isilo sengubo; kodwa uSmakade wakunqanda konke lokho, wakuguqula, waveza ubuhle nenhlanhla ngoba ehlosé ukuhlenga impilo yabaningi ngalokho. Ningesabi-ke, Bakwethu. Ngiyoqhubeka nginondle, ngininakekele – nina nabantwabenu.” Wabaduduza, wabamisa idolo.
Wahlala nabo-ke eGibhithe uJosefa bonke abomndeni wakwabo. Wakhula waze wahlanganisa owekhulu neshumi, wagona abazukulu babantwabakhe. Abazukulu bendodana yakhe uEfremu namadodana omzukulu wakhe uMakhrii, indodana kaManase, azalea-nje usadla amabele!
Kuthé-ke naye esebona ukuthi amandla aya ngokufinyela, wanxusa abafowabo, wathi: “Sengizonishiya mina. UNkulunkulu yena akasoze anilibala. Uyoba nani njalo aze anibuyisele niphephile ezweni alethembisa okhokho benu oAbhraham, noYisaka noJakobe. Amathambo ami seniyowaqoqa-ke nihambe nawo.”
Bamethembisa lokho abafowabo. Washona. Isidumbu sakhe sagqunywa ngamakhambi avikela ukonakala, saliswa ebhoksini khona lapho kwelaseGibhithe.